Согтуурсан, мансуурсан үедээ жолоо барьсан 134 хүнд ял ногдуулав

Тээврийн прокурорын газраас энэ оны нэгдүгээр улиралд 134 хүнд холбогдох “Тээврийн хэрэгсэл жолоодох эрхээ хасуулсан хүн согтуурсан, мансуурсан үедээ жолоо барьсан” хэргийг шүүхэд шилжүүлж шийдвэрлүүлжээ. Тэднээс 10 хүнд хорих, 80-д нь торгох, 19 хүнд нийтэд тустай ажил хийлгэх, 25 иргэнд зорчих эрхийг хязгаарлах ял ногдуулсан байна. Гэмт хэрэг үйлдсэн 134 хүний 0.7 хувь нь 17 хүртэлх, 35.1 хувь нь 18-30, 43.3 хувь нь 31-44, 20.9 хувь нь 45-аас дээш насных байжээ. Ял шийтгүүлсэн хүмүүсийн 87.3 хувь нь эрчүүд байна.

Мөн тээврийн хэрэгсэл жолоодох эрх хасах нэмэгдэл ялыг дээрх хүмүүст 1-5 жилийн хугацаанд хасаж, шийдвэрлэжээ. Жолоо барих эрхээ хасуулсан тохиолдолд өөрийн болон бусдын эрүүл мэнд, эд хөрөнгө, цаашлаад аминд аюул учруулж болзошгүй эрсдэлтэй алхам хийхгүй байхыг Тээврийн прокурорын албанаас анхааруулав.