Таван цаг үргэлжилсэн хэлэлцээрийн ҮР ДҮН

Москва Киевт уулзалт хийх санал тавьсан. Киев удаан бодсоны эцэст зөвшөөрсөн ч үгүйсгэж, Израил эсвэл Туркийг уулзалт хийх газар болгон санал болгож байв. Зеленский бүр Лукашенко руу залгажээ. Шударгаар хэлвэл энэ бүх хугацаанд Зеленский Вашингтоны дарга нартайгаа зөвлөлдөж байлаа.

Эцэст нь шийдэв. Уулзалтыг Припять голын “нууц газарт” хийхийг хүсжээ.

ОХУ-ын Ерөнхийлөгчийн туслах Владимир Мединскийгээр ахлуулсан төлөөлөгчид Украины төлөөлөгчдийг Беларуст хоёр дахь өдрөө хүлээв. Хэлэлцээрт Оросын талаас ОХУ-ын Батлан хамгаалахын сайдын орлогч Александр Фомин, Гадаад хэргийн сайдын орлогч Андрей Руденко, Төрийн Думын олон улсын асуудал эрхэлсэн хорооны тэргүүн Леонид Слуцкий, Беларуст суугаа Оросын Элчин сайд Борис Грызлов нар оролцсон.

Киевээс Беларусын хил хүртэл лимузингээр хоёр цаг л явна. Харин Украины төлөөлөгч нар оросуудтай уулзахаар явахдаа Польшоор дамжив. Тэд Польшид хонож, хооллож (хаашаа ч яараагүй юм шиг, харин Украинд байлдааны тусгай ажиллагаа болж байв), үд дунд Припять руу Польшийн агаарын цэргийн хүчний хоёр нисдэг тэргээр ирлээ.

Нисдэг тэрэгнээс “Ард түмний зарц” намын Дээд Рада дахь Зеленскийн фракцын тэргүүн Давид Арахамия майк, бейсболын малгайтай эрхэмсэгээр бууж ирэв. Тэрбээр саравчтай малгайгаа хэлэлцээрийн ширээний ард ч тайлсангүй. Дипломат уулзалтад бус чангаанз худалдаж авахаар зах дээр ирж байгаа юм шиг...

Бас Украины Батлан хамгаалахын сайд Алексей Резников (свитертэй), Гадаад хэргийн сайдын орлогч Николай Точицкий, Украины Ерөнхийлөгчийн захиргааны зөвлөх Михаил Подоляк...

Хэлэлцээрийн үеэр талуудын аль аль нь хэд хэдэн удаа завсарлаж, хаашаа ч юм бэ утасдлаа. Хажуугаар нь нууцаар шивнэлдэн өөр өөрийн улсын дарга нар руугаа залгана.

Таван цаг үргэлжилсэн хэлэлцээр дуусав.

-Украины талаас мэдэгдсэнээр /Михаил Подоляк цэвэр орос хэлээр ярьснаар/ төлөөлөгчид Украины газар нутагт байлдааны үйл ажиллагаа болон галыг зогсоох гол зорилготой хэлэлцээрийн эхний шатыг хийжээ.

-Талууд тодорхой шийдлүүдийг тодорхойлсон хэд хэдэн тэргүүлэх сэдвийг тодорхой болгосон гэж Украины Ерөнхийлөгч Владимир Зеленскийн зөвлөх Михаил Подоляк хэлжээ. “Эдгээр шийдвэрийг хэрэгжүүлэх боломжтой болгохын тулд талууд нийслэл рүүгээ буцаж байна. Ойрын хугацаанд хэлэлцээрийн хоёрдугаар шат болно. Түүн дээр эдгээр сэдэв тодорхой ирээдүйтэй болно” гэв.

-ОХУ-ын Төрийн Думын олон улсын асуудал эрхэлсэн хорооны тэргүүн Леонид Слуцкий “Талууд бие биенээ сонсох нь чухал” хэмээн сэтгүүлчдэд ярьжээ. Тэрбээр “Бүтээлч яриа хэлэлцээ үргэлжилнэ гэж найдаж байна” гэв.

-“Бид нэгдмэл байр сууринд хүрсэн гэж үзэж болох хэд хэдэн цэг олсон” гэж ОХУ-ын Ерөнхийлөгчийн туслах Владимир Мединский ярьжээ. Тэрбээр “Хамгийн гол нь хэлэлцээрээ үргэлжлүүлэхээр тохиролцлоо. Ойрын өдрүүдэд хэлэлцээр Польш-Беларусын хил дээр болно. Төлөөлөгчид бүх байр сууриа улсынхаа удирдлагатай зөвшилцөнө” гэв.